تیرنگ، رقیه سعیدی نژاد
معنی: گاوی را که پیش پایش است نمیبیند اما پشه ای را که زیر پای مردم است، میبیند.
مفهوم فارسی: این ضرب المثل در مواردی که کسی عیب خودش را نبیند و به عیب دیگران توجه کند، به کار میرود.
میرزعبدلله محله دِله گت آدِم بیه هرکی محله دِله خَلِه مشکل داشته اِمو وِنه پَهلی وِه با ریش سفیدی و تجربه ای کِه داشته مشکل رِه حل کِرده و نِشتِه دعوا بالا بَهیره کار به دادگاه و محکمه بَکِشه مَردِم اَتی زمینِ سامونِ همدیگه جا دَعوا کردنه اَتی اسفندیارِ گو شیه مَش ممِد باغ وِنه هلی قلِم ره خِرده درگیر بینه اَتی یارعلی پَرچین خِراب بیه شال اِمو خاتون نَنه کِرک خِرده نازدونه کیجا احمدآقا بِخواسی بیه وِره نِدانه خِلاصه هزار یک داستان هر روز اون محله دله دَهیه که میرزعبدلله مردِم قاضی بیِه با مِتانِت وِشون رِه حل و فصل کِرده اتا روز ابوعلی که نیسون آبی داشته محله دله و مردِم باغ حاصِل رِه وَردِه یاردِه بمو میرزعبدلله پَهلی بته اوس رضا مِره تهمت دزدی بزو گِنه ته مِه بار ره بَدِزدی مِره پول کم هِدایی میرزعبدلله بَتِه اِجازه هادِه اوس موسی رِه صِدا بَزِنِم ونه حرف بِشدوئیم بعد . اوس رضا ره صِدا بَزونِه بیَمو با هزار آه و ناله که مِه بارِ قیمت بیشتر بیه ابوعلی مِه بار ره بدزدیه. میرزعبدلله ناراحِت بهیه بته ابوعلی اینتی مردی نیِه چندین سال محله دِله مردم امین هسّه نَونِه به راحتی تُهمِت بزنی . ای اوس رضا این جمله رِه تِکرار هاکِرده .میرزا بته ابوعلی ماشین رِه روشن هاکِن بوریم اونجه که بار ره بروتی بَوینیم این حرف درِسته یه نا. سه تایی بوردِنه بارخرین پهلی بدینه بارخرین بوردِه دِتا بارخرین دیگه دهینه بتنه اِما ۱۰۰ کیلو هلی دارمبی چند خریندی اونا همین قیمت که ابوعلی بته بتنه . اوس رضا اَی شه حرف زوئه بتنه نا مِه بار بیشتر از این قیمت داشته . حتما وه مه بار ره ویشتر بروته . میرزا سر تکون هِدا بته ته شه لینگ بن گو رِه نویندی مردم لینگ بن لَل ره ویندی چندجا قیمت بهیتمی همه همین قیمت ره هِدانه برو بوریم اون مردیِ سِره ره پیدا هاکنیم بَوینیم تِه درست گِنی یا نا. بوردنه مردی سره ره به هزار بدبختی پیدا هاکردنه مردی بته اَره برار ته بار همین انده ارزسه الان بازار همین انده کِشِش دارنه اول وِسّه قیمت بهیری بعد مردی ره تهمت بزنی من این مردی ره همین انده پول هدامه.. اوس رضا شه حرفه جا پشیمون بهیمه ته جا عذرخواهی کِمبه . ابوعلی بته من ته جا بگذشت هاکردمه خدا امه جا بگذره
